РФ цӀихеза суртанча, Россе суртанчий Союза доакъашхо, дахчах унцукульски сурташ деча Анчиль тӀехьен кхоалагӀа доал кхоачаш вола говзанча Мухьмад-Iаьла Госенович Магомедалиев; Селий мехка паччахьалкхен преме лауреат, цӀаста пхьегӀаш хьаю, аьшка тӀа сурташ дехка говзанча Iумар Ахмедович Шейхов; аьшка, дошо исбахьален сурташ кхолла Россе суртанчий Союза доакъашхо Хидриильяс Ибрагимович Ахмедов кхаьчар вайцига, шоай хоза кхолламаш дахьаш.

Ше цу балхах цецъялар лочкъадеш яцар ГӏалгӀай Республикан культуран министр Лаьнанаькъан Залина.

Гойтам хьабеллаш хьаьшашка моаршал хоатташ, цо аьлар: «Махачкалера безамца» яха гойтам- искусство езарашта бокъонца дола цӀай да. Говзал лакха йолча, начӀал долча селий пхьараша даьча балхаша цецвоаккх. Шун къахьегам безам тӀабодаш а сийрда а ба. Баркал оал аз шоана, ГӏалгӀай мехка тамашийна говзал гойтарах, дӀахо а иштта дика къахьега низ лулба шоана».

«Паччахьалкхен музея болхлой цӀерагӀа баркал оал аз укх тайпара гойтам вӀаштӀехьабаларах.

Оаха беза лоархI шун болх, из культуран тӀехьален йоккха ганз я. Дӏахо а иштта къахьегара тӀахьех тхо а тха хьажархой а укх тайпарча гойтама. Тхо тешаш да, наьха таро хургья ер тамашийна хоза болх бӀаргаго а, из дег чу бита а. Дӏахо а иштта воайла бувзам лелабеш, керда гойтамаш дӀахьош къахьегаргда вай»,-аьлар, ше къамаьл деш, ГӏалгӀай Республикан ГМИИ кулгалхочо Тӏумхой Любас, цо гойтама доакъашхошта дагалоаттама дипломаш делар.

Ший аргӀагIа, Ахмедов Хидриильяса, Магомедалиев Мухьмад-Iаьлас, Шейхов Ӏумара баркал аьлар гойтам дӀабахьара болх вӀашагӀболларах, иштта белгалдаьккхар шинна а республикан культуран вахаре из эшаш хилар. Дӏахо вай мохк дегӀабар ловш ловца баьккхар.

Белгалду, гойтам дӀабахьара болх вӀашагӀбеллар ГӏалгӀай Республикан культуран Министерство я, РФ культуран Министерствос мога а деш, из гойтам чубоагӀаш бар гӀалгӀай паччахьалкхен 100 шу дизара цӀайна.