Ловзарий даькъ тӀа: майдан тӀа, ринге, адара болча наькъ тӀа, спортсменашта духьалъотташ хул хьаькъал дола, низ бола нах, уж яхьаш я. Цул совгӀа вайна юкъе болаш ба цӀихеза нах, боккъонца бола атлеташ. Цар дукхача шерашка къахьег цӀихеза, начӀал дола нах шоаш хиларах тарра, шоай цӀи юташ вахаре, царгара масал эц тӀехьа тӀабоагӀача наха, дика толамаш доах, лерттӀа тӀехье кхее вӀаштӀехьадоал уж хиларах.

Царех цаӀ ва республикан «Динамо» яхача ГУПа езача атлетиках вола тренер Пхьиленаькъан Мухьмада Ӏалихан, цо кхебу къона штангисташ. Дукхача шерашка денз, из ва ший спортивни дегӀа кеп лораеш, дика спортивни куц долаш, тренировкаш еш, ерригроссийски яхьашка дакъа лоацаш.

Из, дукха ха йоацаш, Россе йийллача чемпионате котваьлар штангистий йоккхагӀча тоабанна юкъе. Уж низ болча спортсменашта юкъе дӀахьош йола яхьаш хилар бекарга бетта 10-ча денгара 13-ча денга кхаччалца Подмосковьерча Къаьнара Купава яхача шахьаре, цига дакъа лоацаш вар 300 спортсмен, вай боккхача мехка тайп-тайпарча моттигашкара вена.

Дика говзал йолча, физически таронаш йоккхий йолча штангисташа дика къоастадир «Акрихин» ФОКе тайп-тайпарча дозалех дикача хьалашка дӀайихьача чемпионате спортсмений начӀал хилар малагӀча боарам тӀа да.

Пхьиленаькъан Ӏалиханах Россе чемпион хилар М-70 дозала тоабанца, 67 килограмм дозал долаш. МеттагӀъ-яккхара хьокхам- 61 кг, хьалъайяр-81 кг, еррига а цхьана 142 кг.

Дувцаш дар аттагӀа кхетадара, хьамсара газет дешархо, хьажал, хьа 70 шу даьннад, Ӏа хьай керта тӀа 142 кийла хьай дозалал дукхагӀа бола аьшка мухь хьалъайбаьб.

Спортах хьабоала пайда бувцаш, Мухьмада Ӏалихана массайолча хана белгалду, саг физически хьинар долаш хилар моллагӀа а ха яьнна из вале а, цунна пайда бахьаш долга. Сага ший къаьстта йола спорта оагӀув хила еза. Каст-каста физически упражненеш, тренировкаш еш хила веза, цо чӀоагӀду сага могашал хилар.

Еза атлетика ювца вай эттача, шеко йоацаш хила, штанга дика гӀирс ба шун могашал чӀоагӀъяра. Геттара доккхий хӀамаш леладе дезаш моттиг яц, кӀира цкъа мукъане тренировкаш еш хила, цо дегӀ чӀоагӀдергда, дегӀацара хьинар совдоаккхаргда.

Пхьиленаькъан Мухьмада Ӏалихана, кхыча къахьегара тӀера болча наха шоай толамашца   хьагойт хӀара сага из карагӀдоалаш хилар. Юкъе ца юташ каст-каста спортивни занятеш дӀахьош хуле, цо кхетадергда, денгара ди массаза дала шийна низ чубоссаш хилар, гонахьарча хозалах дог гӀоздоалаш хилар.