Моаршал хоаттача дешашца таьзета кхетаче гулбеннарашка йистхилар Бӏарахой Бахьаудин- «ГӏалгӀа» яхача ассоциаце президент, ГӀулой Берс, ПхьугӀой Бек-хан - къоаной Совета доакъашхой, Везантин Изабелла Ницца оалача шахьара мэра гӀонча, иштта кхыбараш а.

Хьалхара кхетачен дакъа дӀадоладир КъорӀан тӀара сураш дешаш, байнарашта маьл кхайкабеш йолча оагӀонгара. ШоллагӀча кхетачен даькъе дешархоша, студенташа гӀалгӀай меттала, французий меттала байташ йийшар, иштта цига баьхкача викалашта гойтар 1944 шера хиннар дувцаш йола театра оагӀонаш. Гулбеннараша йоккха терко тӀайохийташ хьежар документальни фильмага, цига доккхагӀа долча ноахала дувцар цу ханах лаьца, шоаш Юкъерча Азе Ӏобахийтачул тӀехьагӀа.

Цул тӀехьагӀа, доакъашхой хӀама даа бийхар сагӀийна байнарашта тӀера кийчдаь хинна. Гулбеннараша белгалдир, укхаза тахан гулбенна хилар гӀалгӀай, нохчий къамаш мехкахдаьха ха дагалаца. Къоалама цхьан йоазонца, шийлача Ӏай Казахстана шийлача моттигашка уж Ӏобаьха хилар. Цу халонашка хьежжа доацаш, царна бицбаланзар вай мотт, Ӏадаташ, къаман культура. Дӏаьха 13 шу даьккхачул тӀехьагӀа, уж юха мехка баьлар, юха 1992 шера хьакхеллар вай республика. Вай декхарийла да из тӀехьале лорае, из дукхагӀа е, миччахьа мара вай цахиларах. Уж вай дагалаттаргба, ноахалгара ноахалга кхоачаш, гӀалгӀай мел бахача моттигашка. Таьзета кхетаче дагаехарашта баркал аьлар из иштта даяхьарах.

Цига дакъа лоацаш хиннача Византин Изабеллас баркал аьлар гӀалгӀай дезалашта, кагирхошта, Бӏарахой Бахьаудина; иштта цхьоагӀо йолаш цо из болх дӀабахьарах. Цо белгалдир, ше цецъяьнна хилар бераш, студенташ цига гойтачох, мехкахбаьхача шоай къаман нахах дувцаш,1944 шера хиннар довзийтарах. Цо ловца баьккхар гӀалгӀай къаманна ираз, машар хилар ловш.