Ахкана йIовхалаеи, Эса бердашкарча нувхийи бувзам

Шолжа района кулгалхоша нахага кхайкарал даьд салоIача хана шоашта тIехьа нувхаш ма йита аьнна.

Эса бердашта юхе гIолла дукхагIа хул салоIараш. Iододача Эса шийлача хиво селлара чIоагIа дIайха хетийтац лотаденна латта ахкан ди. Дале а, хоза салоIам дIабахьа ховш берригаш а бац. Эса чIоже гIолла салоIаш болча нахага хьежа Шолжа района кулгалхоша цу тайпара Iаламца хила мегаргдоацилга хьалхадаьккхар.

Массанена хетт хоза ахкан ханах хина йисте вагIаш, хьазилгий екача оазага ладувгIаш, Iододача хина оаз хьахозаш, цIенача фега садоахаш. Бакъда нийслу салоIача наха шоашта тIехьа ше мел йола нувхаш юташ, шоаш баьгIа моттиг ца цIенъеш, Iаламах дог ца лазаш, из хIалакдеш, — йоах моттигерча Iаьдало.

Из бахьан долаш цар кхейкарал дир: «Хьамасара мехкахой! Шолжа района кулгалхоша тIахьех шо вай хьамсара мохк лорабара, лостам лелабара, баьццарча баь тIа шоашта тIехьа нувхаш ца йитара. Вайгара хьадоагIа район цIена а хоза а лелаяр. СалоIача моттигашка нувхаш ма гулъе, Iалама хозле лорае. ЦIено — лостам баьбар аьнна хургъяц из, нувхаш Iо ца кхувсаш вай лорайой хургъя».