Наьсарен дешархошца хьехама болх дӏабихьар
Наьсарерча №18 йолча ишколе хьехам балара болх дӏабихьар, йоккхагӏа йолча классашка деша дагӏача берашца. Кхетаче дакъа лаца вийхар Гӏалгӏайче гӏолла йолча Россе МВД ветераний Совета викалаш Бузуртанаькъан Ваха, Гӏазгиренаькъан Муса. Иштта дешархошца къамаьл деш хилар терроризма, экстремизма духьале еча Центра болхло, Наьсарен-Шахьара полице кхувш боагӏарий гӏулакхех вола инспектор.
«Къамаьл дӏахьош керттера терко тӏаяхийтар кагирхой сакхетам совбаккхара, царна кхерамзлен хьал хьалхадаккхара. МВД болхлоша, ветеранаша дешархошта дийцар наркотикаш лелаяр, терроризма, экстремизма зуламаш дар унзара хьал долга, цох хьадоала во гӏулакхаш наха юкъе доаржадер бехктокхаме озаш хилар. Къаьстта йола терко тӏаэзар таьрахьий кхерамзлен: берашта хьалхадаьккхар, вахара бувзамашка гӏолла йолча интернето леладеча зулама юкъебаха хьашт доацилга. Хьехам беш берашта довзийтар кагирхой воча наькъ тӏа боахаш дола хаттараш, наькъаш, царна гойтар бувзамашка гӏолла, лайкаш оттаярца, кхыйола таронаш лелаярца шоашта а ца ховш, зуламхоша уж цу наькъ тӏа боахаш хилар. Царна хьалхадаьккхар цу тайпара хьалаш леладеш хиларах, малагӏча бехктокхаме уж оттабергба, цар таьрахьий лараш тешаш санна царна духьала хургйолга», - аьлар «Сердало» газетага Гӏалгӏайчен МВД зарбан-болх лелабераша.
Кхетаче чакхйоалаш, хьаьшаша кхайкарал дир лакхерча классай дешархошка. Цар хьалхадаьккхар берашта; шоай хургдар вӏашагӏдоллара ма хулла дикагӏа деша хьажа, спортаца ювзаенна могашал лорае, дешарга гӏолла дегӏадоагӏаш хила, аьнна. Лаьрххӏа йола терко тӏаяхийтар ший къаман ӏадаташ, мах бола культура лораяра, иштта шоай мохк безаш хилара.
Дешархой а дийцача къамаьла терко еш хилар, юххера а дӏа-юха къоасташ цар хьаьшашца цхьана сурташ даьхар.
Цу тайпара кхетаченаш дӏахьош хиларо таро лу, кхувш йоагӏача тӏехьен юкъе бокъоний культура лакхъе, царна интернет-даькъ т1ара кхерамзлен бокъонаш йовзийта, бокъонаш лораеча болхлошца, юкъарлонца тешшаме къамаьл де.
