Гӏалгӏайче хургболча водителашта хьалхадаьккхар, миштаб гӏалат далара мах
Гӏалгӏайчен Наьсарен кхала Пхьилекъонгий-Юртарча ДОСААФа автошколе хьехама кхетаче дӏайихьар хургболча водителашца, из хетаяь яр кхерамзлен культура лораяра. Кертте лаьтта дош дар царна наькъа-транспорта хьал довзийтар, машинашца лелаш бола водителаш харцахьарча наькъах лорабар.
«Дувцар нахалдаккхара даькъ тIарча болхлоша дика вӏашагӏбеллабар хургболча водителашта наькъа кхерамзлен хьал довзийтара болх. Из къамаьл дӏахьош, цар ма дарра къоастадир наькъа болама бокъонаш телхаеш хилча нийслуш дола хатараш, иштта белгалдир, хьалхарча аргӏагӏа Ӏомалуш боагӏача кердача водителашта ха дезар. Царна хьалхадаьккхар хьалххе а зулам дала тарлуш йола моттигаш юстаръяха мишта ха деза, наькъа хьовзама ше юкъе нийслургвоацаш малагӏа бокъонаш лорае еза», - аьлар «Сердало» газетага Гӏалгӏайчен Госавтоинспекце.
Шоашта беш бола хьехам цар дикагӏа кхетабергболаш, цу хаттарах дола фильм гойтар. Чӏоагӏагӏа пайда эцара йола видео гойтар, цо хьалхадаьккхар водитель сиха воагӏаш хилча малагӏа хатар нийслу. Доакъашхой уйла еш бар, водитела бехках доккха хатар дала йиш йолаш йола моттигаш шоашта гойтача хана.
Геттара терко тӏайохийташ ладийгӏар Гӏалгӏай Республике гӏолла йолча МВД Госавтоинспекце Урхаллен пропаганда болхлочо Берсенова Людмилас баьча хьехамга. Цо наьна дег чура доагӏа кхайкарал дир курсанташка, цо белгалдир, наькъа кхерамзле - из хьалхарча аргӏагӏа сага вахар хилар. «Со я нана, сона чӏоагӏа лоархӏаме да шо маьрша шоай ноаношта хьалхашка оттар. Сих ма ле, наькъа кхерамзлен бокъонаш лорае. Шоашка хьежаш эггара хьамсарагӏа бола нах хилар даим шоай дагахьа лоаттаде»,- аьлар цо. Цу хьехамо хургболча водителашта хьалхадаьккхар, шоашта уллув машина чу Ӏоховш мел волча сага вахар лорадара уж бехктокхаме болга.
