Гӏалгӏайчен шоай хӏама хьадерашта хьалхадаьккхар, бизнес мишта лорае еза
Гӏалгӏайчен предпринимателий бокъонаш лораяра викала чуйоагӏача Юкъарлон кхела кулгалхочо Гоамакортанаькъан Ахьмада дакъа лаьцар республикан гӏулакхаш леладерашца хиннача вӏашагӏкхетаре. Цар лаьрхӏар «герга истол» дӏадахьа, «Бизнес лораяра паччахьалкхен хьалаш» дувцаш. Из болх вӏашагӏбеллар яр, «Къонача предпринимателий Ассоциаци» яхача Юкъарлон моттигера оагӏув.
«Сердало» газетага ма аллара, цун керттера маӏан дар зӏамигача, юкъерча предпринимателий моттигий бокъонаш лораяр, иштта дика пайда луш дола къамаьл бизнеса, ӏаьдала юкъе вӏашагӏдоллар. Доакъашхой теркама юкъе хилар паччахьалкхен, доал деча даькъ тӏарча ӏаьдала лоархӏаме хаттараш. Дукхагӏча даькъе, йолаш йолча цхьоагӏонах, иштта бизнесах, вай заман экономически хьалех, тӏахьожама балхах, законо дӏадехарех дийцар эксперташа.
Гоамакортанаькъан Ахьмада белгалдир из лоархӏаме долга, майдаш хьакхоллара, предпринимателий болх дикагӏа тоабара, бизнес лелаяра, администраце оагӏорахьа дӏадехараш лохдара. Доакъашхой таро хилар шоай бокъонаш лораяра накъадоалаш дола хаттараш довза, предпринимателий болх Гӏалгӏайче дегӏабоалабара керда хаттараш тахка.
