Москверча Гӏалгӏайчен викала балха моттиге кагирхой кхерамзленах «герга истол» хилар
Терроризм, экстремизм яхача доккхача, бӏехача зуламех вай къона тӏехье лораяра тӏехьа лоаттабе безача балхах дувца гулбелар тахан Москверча Гӏалгӏайчен викала фусаме. Мехкарча Миннаца, Викала балха новкъосташа вӏашагӏъелла кхетаче яр из. Цига гулбенна хилар Москве дешаш бола вай студенташ, кагирхой юкъарча оагӏон хьалхалаттараш.
Кхетаче доклад ешаш къамаьл дир викала Оздой Муслима, республикан Миннаца оагӏонна кулгал деча Харсенаькъан Мухьмада, Татрий мехкарча Гӏалгӏайчен викал волча Хьаьшанаькъан Амира, мехкарча АТК аппарата кулгалхочун гӏончас Оздой Мухьмада, дийша саг волча Албохчанаькъан Мухьмад-Башира, иштта Кутафин Е.О. цӏерах йолча хоамий, кхерамзлен МГЮА института кулгалхочун гӏонча волча Рашитханов Руслана.
Гулбеннараша дийцар къонабарашта юкъе гӏалгӏай къаман ӏадаташ, гӏулакхаш чӏоагӏдарах, иштта интернета оагӏонашка гӏолла кагирхой тувлабе, кегабе гӏертача зуламхоех лорабара тӏехьа болх лоаттабарах, иштта хӏама леладераш гучабаьлча мишта хьовза беза царна хьалхадаккхарах.
Хаттар-жоп долаш дӏаяхар из лоархӏаме кхетаче. Москверча вай къонабарашца, уж воча гӏулакхех лорабара тӏехьа болх дӏахьош,кхоачашде дезараш белгалдир цар.
