Гӏалгӏайчен яхархочоа суд яьй, бокъо йоацаш наьха цӏагӏа чуяларах
Гӏалгӏайчен №4 йолча машара судхочо уголовни гӏулакх чӏоагӏдир моттигерча 49 шу даьннача яхархочоа духьала. Из бехке ю зулам дарах РФ УК 1 даькъа 139 статьях (бокъо а йоацаш, цу чу вахаш волча сага духьале а яь, из наьха цӏагӏа чуяларах), яхаш, дийцар «Сердало» газетага республикан Прокуратуре.
Тхоца къамаьл даьчо ма аллара, суда гӏулакх къоастадеш белгалдаьд, 2026 шера тов бетта 20-ча дийнахьа, цу кхалсага зулам даь хилар, Гӏалгӏайчен Магӏалбика кхале. Вежарий-Юрта Майси урамах цхьан цӏагӏа, наьха наӏарга хьачувоаллача уллача кӏувсилга кӏалхара дӏоагӏа хьа а ийца, цар цӏагӏа чуяьннай из.
Цунца цо наьха конституционни бокъонаш толхаеш дола зулам даьд. Фусам лораяр чӏоагӏа тешам луш да РФ Конституце 25 статьях, цунга хьежжа, цхьаккха а саг бокъо йолаш вац, фусам - даь пурам доацаш, цун цӏагӏа чувала.
Паччахьалкхен бехк беш волчун оагӏув хьаллаьцар судо. Из бахьан долаш, цу кхалсага мировой судхочо 200 сахьата болх бе безаш кхел йир.
