Федеральни оагӀорахьара хьалхадаккхарах «Са бизнес», «Экспорт хьаллацар» яха центраш хьакхеллар, доалахьара хӀама хьадераш болабелар шоай бизнес дегӀайоалае. «Са бизнес» яхача центро 1 эзар совгӀа хьалаш лоаттадир 9 эзар МСП моттигашта, хӀаьта «Экспорт хьаллацара центро 331 консультаци йир, чура экономически болх лелабеча 104 компанена.

Ший доалахьара хӀама леладерашта уж хьаллацара йолча ганзо дика новкъостал лоаттаду бизнес дегӀайоалаяра,127 боахама 200 млн сом дийкъар, зӀамига ахчаш денна, цу юкъе 61 млн совгӀа тешаш а оттабаь хьаийцад.

ТӀехьара тӀа, шоай доалахьара хӀама леладеча 18 эзар вахархочунна таро елар регистраци е, цунца цхьана хьатӀабоагӀача пайдах луш йола йоал 4% е 6% кхоачаш кӀезигйир.

Белгалду, 2019-ча шера денз, республике шоай доалахьара хӀама леладераш 70% дукхагӀа хилар.

Иштта новкъостал дир юртбоахамашта: 623 боахама ахчанца новкъостал дир. Из бахьан долаш 2024-ча шера арахецаш йола юртбоахама продукци 20,5 млрд сома хилар, из дукхагӀа я, 2021-ча шера хинначул, 15,5 млрд сома.

«Цу дерригне таро ялар арахецаш йола продукци дукхагӀа хилийта, из дӀадахача 2021 шера хинначунга хьежача 156% дукхагӀа хилар, хӀаьта арахецаш йола продукци 104%», - аьлар ший вахара бувзамашка Келаматанаькъан Махьмуд-Ӏаьлас.

Белгалде деза, ГӀалгӀайчен бюджете хьачубоагӀа пайда а лакхбеннаб юртбоахама продукци арахецарах- 2022 шера денз 2024 хьалхарча ах шерага кхоачаш из яр 780,4 млн сома.