Гӏалгӏай мехка «Сунт» яха болам дӏахьош, 300 совгӏа наькъа бокъонаш телхаераш гучабаьхар
Гӏалгӏайчен полице дӏабихьар «Сунт» яха сихача хьехама болх, из лаьрхӏа бар республикан наькъашка кхерамзлен ӏалашо яра, бокъонаш лораяра. Из болх вӏашагӏбеллабар республикан законаш лорадеча керттерча викала - чурча гӏулакхий министра, полице инарал-майора Котов Владимира тӏадиллача декхарах.
Гӏалгӏайче гӏолла йолча Россе МВД зарбан болх лелабераша «Сердало» газетага ма аллара, наькъа инспектораш дӏаайттар республикан транспорта керттерча моттигашка, юрташка чувоаллача. Тӏахьожама болх чӏоагӏбир «Аланий коанаӏарашка» республикан столице чувоаллача, иштта Наьсарен доал деча даькъ тӏарча Буро кӏалхарча машений наькъ тӏа.
Дагадоаца хьал наькъа тӏахьожама балха нийслургдоацаш, юкъебаьхар Росгварде республикан Урхаллен «Беркут-Юг» ОМОНа бӏухой.
Цига, сихача хьехама болх дӏахьош, бокъонаш лораераш хьежар лаьрххӏача 387 сага хоамий базашка, иштта 310 транспорта хьалашка.
Из болх дика вӏашагӏбелла дӏабахьарах, 325 административни бокъонаш телхаеш дола гӏулакхаш гучадаьхар.
