ӏанга а кердача шера цӏайга а кийчо яь яьннай
Гӏалгӏай мехка ӏан зама хьаотташ, иштта кердача шера накъадолхаш, кийчо яь яьлар. Республикан Паччахьалкхене, вице-премьера Антонов Игора кулгал деш, чоалханерча хьалах, цӏера кхерамзленах йолча комиссе кхетаче дӏайихьар, цига дийцар энергетически хьалах, вахара коммунальни боахама кийчонах дола хаттараш.
Гӏалгӏайчен Минэнерго викалаша хоам бир, деррига гучадаьха дола кхоачамбоацараш юкъера дӏадаьха хиларах, ара шелал тӏаялехь кийчон балхаш деш. Энергетически даькъ тӏа кийчо яьй 90%- «Ингушэнергос» йистедаьхар лаьрхӏа хинна тоадара балхаш. Нагахьа санна авареш нийслуш моттиг хуле, кийчъяьй 17 тоаба, иштта 16 техника.
«Хьалххе техникаца ӏалашо яь хиларо, цӏаьхха этта хьал юстардаккха таро лу энергосистеман, коммунальни вахара даькъ тӏа», - аьлар кхетаче дӏахьош Антонов Игора.
Цул совгӏа, белгалдир кердача шера цӏай дола денош дӏахьош кхерамзлен ӏалашо е езаш хилар. Ишколашка, берий бешамашка утренник дӏахьоргда, терко тӏайохийтаргья цӏера кхерамзлен ӏалашо яра.
Дешара, ӏилман Министерствос шийна чуйоагӏача моттигашта хьалхабаьккхар цига дӏабахьа беза болх. Иштта кхетаче дӏахьош дийцар граждански оборона гойвзанчаш кийчбарах, шера дола декхар цу даькъ тӏа 24% тӏехкхоачашдаь хиларах.
Кхетаче чакхйоалаш, Антонов Игора тӏахьийхар деррига боахамаш, массахана кийча хилара, къаьстта кердача шера цӏай дӏахьоча хана, цу хана дукхагӏа низ тӏабуж ӏаьдала балха доакъошта.
