Шолжа районе кхаь юртарча наьха, кхетаче хилар

Цига дакъалоацаш хилар: моттигера депутаташ, вай правительства, МВД, прокуратура викалаш.

Хьалхарча дешаца къамаьлдир, Чималхера кулгалхочо Амренаькъан Ахьмада.

Эггара кертте лаьтта хаттар-сердалонца Iалашо яр кхоачашдар, аьнна белгалдир цо. Цу гIулакха, юрта ткъо керда электролини яьй, цу тIа сердал лораеш йола 70 лампа а егIай.

Хицара гIулакх а бокъонгахьа даьннад, хьалхагIа нийслуш хинна кхоачамбоацараш юкъера даьхад, хIанз, юрта бахача наха, хица ца хаддаш Iалашо яьй ала, йиш йолаш да из хьал.

«Юртара вахар тоадара йолча программах, моттигерча Iаьдало, Чималхе, берий беш, ишколаш, ФОК — хьалъергйола заявкаш дIачуенний.

Массехк кхоачамбоацарех лоархIаш да, тахан, юртара мобильни бувзама хьал, Интернет.

Селхан кхетаче хилар са, ГIалгIай Республика цифровой оагIорахьа дегIайоалаяра кердача министраца Бадмайца. Со цига а волаш, из кхоачамбоацар юкъерадаккхара никъ лохаш хилар из, кастта цунах а дика хоам хургба аьлар цо», - аьнна хоам бир юрта кулгалхочо.

Берда-юрта кулгалхочо Гадаборшанаькъан Мухьмада яхачох, кастлуш цар юрта зIамига стадион хьалъергья. Цо таро хулийтаргья кагийбарий меттел, боккхийчар а унахцIено лорае, салоIама моттиге, шоай мукъа ха спортаца ювзаяь дIаяхьа.

Берда-Юрта юкъерча урам тIа, из тоаеш, балхаш дIадахьа лерхI. Из дIадахача шера «Комфортная городская среда» яхача программах кхаж кхачарах тоаеш я.

Цига иштта, IойогIаргья бийсана йоага лампаш, салоIама гIандаш оттадергда, нувхаш Iо ца легаяра йола пхьегIа латтаргья гIандашта уллув, баьццара кагий гаьнаш дIайогIаргья, цунна йIоахал хургья 450 метр.

ДIадахача шера а, бийсана йоагаю лампаш егIаяр укхаза.

Эггара чIоагIагIа гIадвугар да-хьатIадоагIача шера Берда-Юрта 250 моттига лаьрхIа керда ишкола хьалъергхилар. Дукхача ханашка сатийса хаттар дар из.