Наьсарен викалаш шоашта ховр декъаш ба, «PRO баьццаръерзаяр баьцовгӏаш» яхача гойтаме
Наьсаре шийна ховш дар довзийташ я «PRO баьццаръерзаяр баьцовгӏаш - 2026» яхача Халкъашта юкъерча гойтаме. Из гойтам дӏахьош ба Минеральни Водашка. Наьсархой лаьрххӏа цига бийхаб, из кхетаче хетаю хозача баьцашта, экотехнологена.
Цига таро я шоайла балха говзал екъа, ховр дӏа-юха ала, баьцовгӏаш лелаерашца, ӏаьдала викалашца, архитекторашца, шахьар, кхыйола моттигаш, ков тоадерашца, Россера а кхыча мехкашкара а баьхкача хьалхале лелаеча эксперташца дагабала.
«Наьсарен викалашта юкъе я шахьара кулгалхочун гӏонча Мархенаькъан Милана, ЖКХ кулгалхочун гӏонча Ужахьанаькъан Лида, иштта доалахьарча хьалий отдела говзанча Къулбужанаькъан Фатима.
«PRO баьццаръерзаяр баьцовгӏаш» яхар из баьццарча хьала хетаяь йоккха майда я: дӏаювча хIамангара шахьараш баьццаръерзаярга кхаччалца. Наьсаре цу юкъе дакъа лоацаш хилар лоархӏаме да, из дика таро я, царна йовзаргья укх заман технологеш, иштта шоашта ховр дӏа-юха эцаргда мехкашта юкъе», - аьлар «Сердало» газетага Наьсарен шахьара администраце зарбан болх лелабераша.
Наьсарен мэра Оздой Руслана белгал ма дарра, тӏехьарча хана шахьаре дукха болх бу из тоаяра, экологически оагӏонаш хьакхоллара, иштта йолаш йола салоӏа моттигаш кердайоахаш, баьцовгӏаш дӏаювш.
Оздой Руслана яхачох, цу тайпарча гойтаме вахар, говзал эцар накъадоал архитектуран керда оагӏув юкъейоаккхача, цо таро лу шахьара хоза хьалаш хьакхолла.
