ГӀалгӀай къаман
юкъара газет

Новости


Гӏалгӏай паччахьалкхен университете дӏайихьар, «ӏилма О+» яха фестиваль

Гӏалгӏай паччахьалкхен университете дӏайихьар, «ӏилма О+» яха фестиваль

Республикера дешархой гулбаь хиннача «Ӏилма О+» яхача фестивала болх чакхбаьккхар мехкарча университете. Вуза аудиторешка, лабораторешка шин дийнахьа дешархошта лаьрхӏа гойтама балхаш, кхетама хьал довзийташ йола моттигаш, иштта кхыдола кердадараш хилар.

Фестивала болх дӏаболабеш лаьрхӏа къамаьл дир гулбеннарашка ИнгГУ ректор, духлохама ӏилмай доктор, искусство тахкара балха кандидат, МГУ профессор, цӏихеза ӏилман болхло йолча Ӏалбаканаькъан Фатимас. Факультетий деканаша хьаьшашта йовзийтар дешара программаш, университете дӏахьош дола ӏилман балхаш, иштта лоархӏаме моттиг дӏалоацаш хилар российски космонавташа видеога гӏолла къамаьл дар.

Укх шерара фестиваль «Хьа космически Дуне» яхача хьалхаленца дӏахьош яр. Йоккхача программан юкъе дар криминалистикаца, унахцӏенон оагӏонца, биотехнологеца, экономикаца, истореца, филологеца, журналистикаца дувзаденнараш.

ИнгГУ факультеташа дешархошта кийчдаьдар хӏара балхаца дувзаденнараш. Исторически доазон тӏа доакъашхоша дийцар нартски эпосах, вай къаман гӏалех, иштта Россе къамий ӏадаташка гӏолла мохк хьабовзийтар. Экономически факультето гойтар республикан хӏама тоадара тӏехьа сага малагӏа дакъа лаца йиш я, хӏаьта журнилистика оагӏонца «Хьалаха бахьан» яха болх боаржабир, боаггӏача боараме, нийса уйла е, хӏама вӏашагӏдолла хар мишта латт хьежар.

Йоккха моттиг дӏалоацаш, массанега уйла яйташ хилар агроинженереца, унахцӏенон оагӏонца дувзаденнараш. Физиологеца, хирургеца дувзаденнараш тохкаш бар цига, хьалхара гӏо дар мишта хила деза гойтар, иштта баьцовгӏай болх кхыйолча моттигашка мишта латт дийцар. Шин дийнахьа вуза доазон тӏа ӏилман кхетаченаш, литературан детективаш, меттацара викторинаш, иштта кхыдола кхетама хьалаш довзийташ дола ловзараш хилар.

Россе эггара йоккхагӏа йола дешара оагӏонцара проект лоархӏаш я «Ӏилма О+» яхар. Вай мехкарча дешархой аьттув хилар таханара балхаш довза, хьехархошца, студенташца къамаьл де, иштта дӏахойодача хана шоашта вахаре накъадаргдолча гӏулакха хоржам бе.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх