Яхьашка дакъа лаьцар республика ворхI коллективо. Командашка чубоагIаш бар эггара чIоагIагIа бола футболисташ, цу юкъе «Ангушт» футбольни команда доакъашхой а болаш. Цу яхьашка шоайла латар чIоагIа наьха безам а терко а тIаозаш хилар.

Юххера белгалъйир чIоагIагIа йола команда «ГIалгIайчен Ветеранаш», шоллагIа моттиг-Кердача-Редантера «Барт», кхоалагIа моттиг — Наьсар — Кертера "Вайнах«белгалбаьннарашта совгIаташ, кубкаш елар. Иштта уж яхьаш вIашагIъехкараша совгIаташ делар, моттигера футбол дегIайоалаеш цар дакъа лацарах.

Дукха ха йоаццаш Польшерча команда духьаллаташ Россе сборни бесаш лорадар аьнна дIайихьача яхьашка Оздой Мухьмада ловзаш тIайийха футболка кхаьчар Iахильганаькъан Мусайна.

Яхьаш вIашагIъехкараша кхыдола совгIаташ а кийчдаьдар. Цу ловзара дикагIа вола доакъашхо ва аьнна лаьрхIар: Зангенаькъан Тимур («Вайнах»), дикагIа вола бомбардир — Хаьшанаькъан Руслан («ГIалгIайчен Ветранаш»), дикагIа вола защитник — ЦIолой Рустам («ГIалгIайчен Ветеранаш»), дикагIа вола вратарь — Дарсиганаькъан Мустафа («Барт»).

Элдарха-ГIала кулгалхочо уж яхьаш вIашагIъешхкарашта баркал аьлар. Къаьстта Элдарха-ГIалий тIа уж дIахьош хилара чIоагIа раьза вар из.