СВО ветеранашта, «Фермера ишкол» яхача проекта чудоагӏаш, лаьрххӏа дола кино гойтар Магасе
Магасерча кагирхой цхьанкхетарий Цӏагӏа гойтар лаьрххӏа дола «Фермера ишкол» яхача дешара проекта чудоагӏа фильм. Из дешара оагӏув дӏахьош я Россе юртбоахама Министерствос, Россельхозбанка хьаллоацаш, цига дика дакъа лоац «Даьхен лорабой» Паччахьалкхен ганзо. Из кхетаче дӏаяхьар вӏашагӏделлар «Даьхен лорабой» ганза филиало.
«Цу кинога хьалхарчарех хьожараш бар СВО бӏухой, цар дезал, ганза болхлой. Иштта цига баьхка хилар беза хьаьший - Гӏалгӏайче гӏолла йолча СВО ветераний Ассоциаце кулгалхо Саккхаланаькъан Муса, моттигерча Россельхозбанка филиала кулгалхо Курскенаькъан Рустам. «Лаьрххӏа йола ишкол» яхача фильме го йиш яр, СВО бӏухоша хьакхеллача шоай доалахьарча боахамий дика масалаш, цар шоашта бакъахьа хета никъ лахарах дийцар, из болх дика дегӏабоагӏаш хилар белгалдир. Кхетаче дӏахьош Курскенаькъан Рустама дийцар проекта таронех, бӏухой ӏомабара дешарах. Кино чакхдаьлча доакъашхоша шоай хаттараш делар», - аьлар «Сердало» газетага «Даьхен лорабой» ганзе.
«Фермера ишкол» яха дешара проект хиларо, лаьрххӏача операце ветеранашта дика таро лу шоай професси кхыча пайда луш йолча говзалга яккха, тӏема мугӏарашкара цӏабаьхкачул тӏехьагӏа шоай маьрша вахар дӏахо дӏадахьара уж аттача наькъ тӏа баха. Цу программо, Даьхен бӏухошта теоретически, практически дешара хьал дегӏадоаладе аьттув лу, моллагӏа бизнес дӏаяхьа лаьрхӏа дӏаболабеча наькъ тӏа.
Эксперташа иштта хьаллоацаш хиларах, проекта доакъашхой ӏомалу уж хаттараш къоастаде, паччахьалкхен новкъостал дара хаттараш дикагӏа довза, болх дика дӏабахьара йола балха оагӏонаш тахка. Цо таро лу царна тешшаме шоай гӏулакх леладе, шоай доалахьара фермера болх хьамсарча мехка дика дегӏабоалабе.
