МагӀалбика кхале дийцар бюджет чӀоагӀъярах дола хаттараш
МагӀалбика кхале аргӀанара кхетаче дӀайихьар, доал дара даькъ тӀарча кулгалхочо Къоастой Ӏаддал-Хьамида кулгал деш. Кхетаче дӀахьош дакъа лаьцар, доазон тӀарча ахчан-хьурмата хьал дегӀадара бехктокхаме болча кхален ерригача юртий кулгалхоша. Керттера дийца дош дар моттигерча бюджете хьачудоагӀаш дола ахча, иштта йоал яккхара даькъ тӀара административни хьал тоадар. Кхетачен доакъашхоша мах оттабир кхален бюджета хьала; цар лаьрхӀар из дӀахойодача хана тоадара тӀехь къахьега деза, аьнна
«Керттера терко тӀаяхийтар, боахамех, предпринимателий балхах йоалах дола ахча хьачудалара долча хаттарашта. Цар лоаттаду керттера бюджета хьал, цунца мара дегӀайоалае таро яц кхален даькъ тӀара вахара программаш, проекташ. Къоастой Ӏаддал-Хьамида декхар оттадир йоал хьачуялара даькъ тӀара хаттар кхоачашдара болх дикагӀа тоабара, из хьал аттача даккхара. Цунца мара бюджета оагӀув ӏалашъе таро хургьяц», - аьлар «Сердало» газетага МагӀалбика кхален администраце зарбан болх лелабераша.
Къаьстта йола терко тӀаяхийтар газ, хий, ток лелаярах бола мах хьа ца луш, декхар доаллаш хилара. Къоастой Ӏаддал-Хьамида тӀадиллар кхален бахархошта цу даькъ тӀара лаьрххӀа бола болх дӀабахьар; таханарча денга кхоачаш, коммунальни хьалаш лоаттадарах нахага доаллаш дола Ӏаьдала декхар хьадалара йола балха оагӀув юкъеяккхар.
