Наьсарен кхале хьежар дика йоацача фусамашка
Наьсарен кхален комисси яхар, шоай дезалашта дика кхетам ца луча, бераш профилактикан учёте латтача фусамашкара хьал довза дагахьа. Из никъ бахьа безаш бар Пхьилекъонгий-Юрта, Буро кӏалха. Из дош тӏаийцар доал дара даькъ тӏа кхувш йоагӏача тӏехьенца хьехама болх дӏабахьара, цар бокъонаш лораяра йолча комиссе аргӏанара кхетаче йолаш.
«Сердало» газетага Наьсарен кхален администраце ма аллара, балха тоаба чубоагӏаш бар кхувш йоагӏача тӏехьенца хьехама болх дӏабахьара гӏулакх леладу болхлой, иштта цу даькъ тӏара болх дӏахьош бола кхален комиссе викалаш. Ужаш бахар, шоай дезалашта лерттӏа кхетам дӏа ца луш хиларах, КоАп 5. 35 ст. берий дай хьалхагӏа административни бехктокхаме оттабаьча фусамашка.
Цу балха чудоагӏаш дар уж чубахаш йолча моттигашка хьажар, цар мах оттабар санитарно-цӏено лоаттаяра хьала, берашта кхачан продукташ кхоачам болаш йий, шийлача замах тӏадувхача барзкъанца ӏалашо яьйий, дешара, салоӏама моттиг йий тахкар. Цу хьалашка хьажарал совгӏа, комиссе доакъашхоша цу берий даьшца-ноаношца къамаьл хилар, царна хьалхадаьккхар, дезала лерттӏа кхетам балара тахан законо дӏадехар, новкъостал дир уж хаттараш къоастаде.
Шоаш дӏабихьача балхах дувцаш, говзанчаша белгалдир, кхувш доагӏача берий кхерамзлен ӏалашо яь хилар, цар могашала ӏаткъаш хӏама цахилар. Кхален даькъ тӏа хьехама болх дӏахо а массаза санна дӏахьоргба.
