Москверча Гӏалгӏайчен викала балха моттиге дувцаргда, кагирхой интернет-зуламах лорабарах
Россе Президента чуйоагӏача Гӏалгӏайчен викала фусаме «Кагирхошта эхь-эзделах кхетам балара, уж воча наькъах лорабара» йолча темах герга истол дӏахьоргда. Цига из кхетаче дӏахьоргья республикан арахьарча бувзама, къаман политикан, зарбан, хоамий Министерствоца цхьана.
«Сердало» газетага из болх вӏашагӏбеллараша ма аллара, из кхетаче дӏахьош дувца лаьрхӏад, тахан интернете гӏолла ӏехабеш, кагирхой воча гӏулакхашта юкъебоахаш хилар, цу наькъах уж лорабара хаттараш.
Къаьстта терко тӏайохийтаргья эхь-эздела кхетам балара, иштта Даьхенцара безам совбаккхара, ӏадатий мах бараш лорадара, массайолча оагӏорахьара московски вузашка дешаш бола Гӏалгӏайчен студенташ хьаллацара.
Уж темаш ювцаш, цига дакъа лоацаш хургба дика бовзаш бола викалаш, цу юкъе терроризмаца къовсам лоаттабара йола комисси, Гӏалгӏайчен Миннац, Московски паччахьалкхен О.Е. Кутафина цӏерагӏча юридически университета; И.М. Губкина цӏерагӏча газа, мехкдаьттан Российски паччахьалкхен университета говзанчаш, иштта юкъарлон болхлой.
Цига дувцаргда юкъедаьхача бакъахьа дола хаттараш, цар таро лургья шоаш ӏехабеш хилара психологи йовза, унзарча хьалах лорабала, новкъостал эшаш хилча, паччахьалкхен новкъостал деха. Кхетаче чакхйоалаш шоайла къайле йоаца къамаьл хургда, цига хӏаране таро хургья ший хаттар говзанчашка дала.
