«Йоккхача Коталоно Кавказа барт чӀоагӀбу» яха кхетаче дӀайихьар вайцига
Сийлахь-боккхача Даьймехка тӀема Коталон 80 шу дизара хетаяь Къилбаседа Кавказа кхетаче хьайийллар Магасе. «Йоккхача Коталоно къамий барт чӀоагӀбу» яхача къамашта юкъерча вахара-дешара проектага гӀолла, дӀахьош болх ба из. Боккхача тӀема юкъе моастагӀчун наькъаш тедаш, фашист вай лаьтташкара аравоаккхаш лаьттача деналах бизза хиннача бӀухой цӀераш йицлургьяц бӀаьшерашка.
Кхетаче дийцар Россе къамаш моастагӀчун духьала цаӀаш хинна этталга, берригаш цхьа къам санна духьаллаттаро котало вайгахьа хилийталга. Фашист ший низах вохавеча тӀема юкъе; доккха, лоархӀаме дакъа лаьцад Къилбаседа Кавказо.
Цо кхебаь къонгаш, кхерам яхача дешо юха ца боахаш, шоай синош ца кходеш духьаллаьттаб, фашист ше чугӀортарах дехкевоаккхаш.
Кхетаче гулбелар СКФО моттигашкарча юкъарлен оагӀонцарча палатай доакъашхой, Ӏилманхой, историкаш, культуран оагӀонцара болхлой, кагирхой.
Магасерча «Коталон парке» баха, тӀема шерашка вахар хаьдараш дагалаьцар цар. Кхетаче белгалдир, тахан ураотташ йола тӀехье, из деррига хьалхадоахаш, Даьхенцара безам, цун хӀама лорадар эггара керттерча декхарех долга белгалдеш, кхее езилга.
Цига дийшар мехкадаьгара Келаматанаькъан Махьмуд-Ӏаьлагара каьхат. Республикан кулгалхочо белгалдир, боккхача тӀема котало вайга дукхача бӀухой вахар хадаш, дукха низ Ӏобуллаш кхаьчалга, вай дерригаш массахана цу хӀаман хам беш, из диц ца деш, даха дезилга.
«Тахан, уж хала шераш дагаухаш, тӀема аренашка моастагӀа вохавеш, из эккхавеш лийгараш хьоахабе беза вай.
Укх вӀашагӀкхетаре белгалдаьраш дӀахойодача хана дикка накъадаргда аьнна хет сона. Сийлахь-боккхача Даьймехка тӀем тӀа Котало вай массане дегашка къаьстта лоархӀаме моттиг дӀалоацаш я.
Коталоно кхотадеш, цаӀаш деш латталда вай дӀахо а»,- аьлар Мехкадас.
Цу йоккхача кхетаче доаржадаьраш дикка накъадаргда вайна керда проекташ кхоллача, мехкашта юкъера бувзам чӀоагӀбеча, Россе дахача къамий истори, Ӏадаташ лорадара тӀехьа.
