«30 балха юкъера эггара дикагӀа дола балхаш хержар кхелахоша. «Денала никъ Z» яха спорта марафон лакхача боараме гойтача Барханой Мухьмада тӀема гӀулакхаца дувзаденнар доаржаде 480 000 сом кхаьчар. «Дай оаз» яхача аудиоспектакла лаьрхӀа 390 000 сом къоастадир Пхьилекъонгий Беслана. «ГӀо де са вахара» яхаш бола Янданаькъан Марета проектни болх 450 000 эзар сомаца лаьрхӀар. ГӀулой Аминай «ГӀалгӀайчен кхоане» яха новелла 360 000 сом луш белгалйир, «Кулга-говзала дуне: дӀадахари таханардари» яха болх дагалаьцача Хамхой ПаьтӀамата 230 000 къоастадир, «Дезалца салаӀар» яха Галай Хьавай балха 260 000 сом делар», - дийцар кагирхой политикахи туризмахи йолча министерствон хьалха латтача Малсаганаькъан Адама.

«Дуненца дог ловзаш ваха» яхача Хьулахой Назира проекта – 220 000 сом, «Турпалий сомий бешамаш» яхача ЦӀечой Исроапила проекта- 420 000, Программированех, робототехниках йола моттиг хьаелла лаьрхӀача Солтмаканаькъан Ахьмада- 430 000. 340 000 сом луш къаьстта белгалвир «Меттацара кердадараш» яхача оагӀонца къаман мотт боаржабеш вола Зангенаькъан Накир. «ТХО - Даьхе» яха болх боаржабе уйла йолча кхыча мехкарча Игумнов Игоря 420 000 сом делар.

«Доккха баркал оал селлара хоза тӀаэцарах. Кхетачен доазув довзарал совгӀа, ЖӀайрахьа а хиннад тхо. ГӀалгӀай мехка со хьалхара вена ва. ХӀаьта грантови яхьех аьлча, кагирхой дегашка дукха дика уйлаш я, бакъда котбаьннарашта юкъе эггара дикагӀбараш бахар», - аьлар «Роскагирхой» яхача оагӀон болхло волча Ногтев Дмитре.