216 шу даьннача хьункхора гаьнах укх шерара Га хила мегаш я
Ши бӏаь шу совгӏа ха йолаш я Жӏайрахьа кхален Лаьжге яхача гӏалай юрта ягӏа кхора га. 216 шу даьннача цу гаьнах гӏалгӏай къаман вахаре нийсденнача дуккхача хӏамай теш, исторен цхьа оагӏув ала йиш я тахан. Тийнна массадолча хӏаманга лакхера хьежаш, деррига зувш латт низ бола тӏахьажархо хет цох тахан.
«Сердалога» цу оагӏонцарча министерстве дийцачох, дуккхача шерий гӏайгӏа чуэза йола вай га «Укх шерара Россе га» яхача берригача мехка яхьашка дакъа лоацаш я. Мехкара керттера га хинна дӏаотта мел эшар ший истореца долаш я из аьлча, харцахьа хургдац. Республикерча бахархоша, иштта Кавказа моттигаш езаенна мел бараша хьаллоаце, хьалхарча моттиге отта йиш йолаш я къаьнара кхора га. rosdrevo.ru. адресага гӏолла дакъа лаца йиш я хоржамашка.
Дакъа лоацарашта юкъе 9-ча номерах латт из, хӏаьта хоржамаш маьцхали бетта 1-гӏа ди отталца хургда. Гӏалгӏайчен ӏалама оагӏонцара белгало дӏагойта еза вай, массане дакъа лоацаш.
