Шолжа-Шахьаре, къахьегама шоатта долаш, 220 гали нувхаш гулйир
20.04.2026 10:04
Шолжа-Шахьарера моттигаш цӏенъе арабаьннача ӏаламах дог лазараша 220 гали совгӏа нувхаш гулйир. Из хоам «Сердалога» бир цу гӏулакха хьалха эттараша. «Бӏаьстен денош хьаоттарца, дӏаболабаь болх ба из.
Шахьара администрацера, стадионера, «Шолже» яхача ансамблера, ЖКХ оагӏонцара араваьннараш 150 совгӏа саг бар. Къаьнара, йокъаенна гаьнаш дӏайоахаш, шахьара моттигий куц доаккхаш къахьийгар цу дийнахьа. Къаьнарча, дӏаяьхача гаьнашта меттел; къона, дика гаьнаш дӏайогӏа лерхӏ», - дийцар тха газетага.
«Шахьара моттигашка цӏена, лостаме хилар вай юхь гойташ дола хӏама да. Доккха баркал ала лов цу дийнахьа ара мел баьннарашта. Цхьана къахьегарца Шолжа-Шахьара моттигаш тоае вӏаштӏехьадаргда вай», - белгалдир ӏумаранаькъан Аслана.
