ГӀалгӀай къаман
юкъара газет

4,5 эзар вайцигарча лора лаьрххӀа дола социальни ахча ийду

Ер шу дӀадоладелча денз, ГӀалгӀай Республике гӀолла йолча Россе социальни ганза отделене лаьрххӀа дола лорий ахча хьаийцад 316 миллион 4 683 сом мехка лораша, яхаш, дийцар «Сердало» газетага ГӀалгӀай Республикан Кулгалхочун зарбан болх лелабераша.

Керда новкъостал дара лорашта луш дола ахчаш лаьрхӀа да унахцӀенон хьалхарча мугӀарашка латтарашта, центральни, кхален, даькъ тӀарча дарбанчий болхлошта, иштта лорий сихача новкъостала станце болхлошта. Из да; 4,5 эзар сомагара 18,5 эзар сомага кхаччалца; малагӀча дарбанче саг болх беш ва а, фу болх беш ва хьежжа.

Уж организацеш юкъейоалаяь хила еза, паччахьалкхен е доал деча даькъ тӀарча унахцӀенон системанна, е дакъа лоацаш хила еза, ца хилча яргйоацача лорий страховане балха юкъе.

«ГӀалгӀайче 17 лорий организацей список оттаяьяр, цига болх беш бола лораш бокъо йолаш ба лаьрххӀа дола ахча эца. Со тешаш ва, цу дешо лорашта дика гӀо дергда, аьнна. Иштта, хьалхарча новкъостала лорашта, кхален дарбанчешка, сиха лорий новкъостал деш болх бу лораш шоай балха тӀа хилийтара йола кӀийле чӀоагӀъергья цо, цул совгӀа, къонабараш а цига балха отта ловш хургба», - аьлар Келаматанаькъан Махьмуд-Ӏаьлас.

Лорашта луш дола ахча хьадоагӀа лорий урхалленаша оттабаьча балхага хьежжа, цул совгӀа, е заявлени язъе езаш, социальни фонда отделене справкаш дӀаяла езаш бац уж. ХӀара бетта лорий урхаллено болхлой электронни реестр вӀашагӀйолл, из дӀачулу моттигерча фонда отделене, тӀехьара тӀа доагӀаш дола ахча хьаэца дагахьа.

Реестра чубоагӀаш хул болхлочох, цунна доагӀаш долча социальни ахчах бола хоам, цига гӀолла рассчёт а ю. Ахча хьадайт, балха 7 ди далале, реквизиташ лорий урхалленаша дӀайохьийт, ГӀалгӀай Республике гӀолла йолча Россе социальни ганза отделене.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде