58 керда автобус кхаьчай вай мехка
29.12.2023 00:56
Вай мехкарча машиний парке 58 керда автобус кхаьчар. 45 маршрутах лелаш 78 автобус хургья вайцига, царна юкъера 31 автобус вахара лоархIамеча маршрутех лелаш хургья. Цул совгIа, 5 автобус дикка лелалуш боаца, дегIа могашал эшаенна нах дIа-хьа кхувлаш хургья. Из хоам «Сердало» газетага бир Мехкадаь зарбан болхлоша.
Федеральни оагIоно гIо деш, аьттув баьннаб вай уж автобусаш эца. Ерригаш а ийцараш зIамагIа йола ГАЗ яхача марках 78 автобус я. Шахьаре, шахьарал арахьа болх беш хургья ж. ДIадахача кIира хьакхаьчар кхы а 20 автобус. Цар тIа болх бе безарашта дIоагIаш дIалуш хиннар Мехкада ше вар. Келаматанаькъан Махьмуд-Iаьлас белгалдир, паргIата, цIена йолча автобусашца дIа-хьа ахар бахархошта лоархIаме хилар.
РФ паччахьалкхено, президента новкъостал даь, из аьттув баьннаб вай тахан. Мехкадас теркалдир, моттигера автобусаш кердаяхар, РФ президента оттадаьча декхарех цаI долга. Гаьнарча юрташкара бувлаш, дIа-хьа ухача наха чIоагIа паргIато я из тахан. Цул совгIа, цIенача машенашца лелаш дега а паргIатагIа, кхерам боацаш, хул.
Моттигашкарча машений паркеашкара машинаш кердаяха лерхI хьатIадоагIача шерашка. 17-19 саг кхувла моттигаш йолаш я автобусаш. Таханарча хано дIадеххача тайпара, тахограф, ГЛОНАСС, камераш, картаца ахча дIателар долаш я уж.
