Гӏалгӏайчен бархӏ дарбанченна медгӏирсашта 588 млн сом лургда
Карарча шера эша гӏирсаш эцара вай мехка дарбанчешта, поликлиникашта, бераш деча керттерча моттигá лургда 588 млн сом. Из ахча луш да «Дӏаьха, дика вахар», «Дезал» яха къаман проекташ кхоачашъяра, яхаш, дийцар «Сердало» газетага Гӏалгӏайчен Кулгалхочун, Паччахьалкхен зарбан болх лелабераша.
Керда гӏирсаш эцаргда республикан бархӏ лорий моттигá. Царна юкъе я Наьсарен поликлиника, Берий клинически дарбанче, Наьсарен, Магӏалбика кхалений а керттера а дарбанчеш, иштта Шолжа даькъ тӏара дарбанче, Шолжера керттера ӏалбаканаькъан А.А. цӏерагӏа дарбанче. Царна лаьрхӏа эцаргья томографаш, УЗИ аппараташ, реанимаце, анестезиологе, эндоскопически тохкамаш дара лаьрхӏа гӏирсаш.
Республикан Кулгалхочо белгалдир; из хьал Россе Президента Путин Владимира керттера лоархӏаш да, аьнна.
«Къаман проекташ кхоачашъяро моттигашта дика дегӏаахара таронаш лу, вай уж ма хулла дикагӏа юкъеяха еза», - аьлар республикан кулгалхочо.
Къаьстта дийцар керттерча бераш деча моттига таронаш тоаярах. Цунна лоархӏаме да, керда хьадаьча берашта пехкашка са доахийташ йола искусственни аппараташ, реанимаце истолаш, кхыйода гӏирсаш эцар.
Из болх хьалхара дӏахьош бац. 2019-ча шера денз, «Унахцӏено» яхача къаман проекта чудоагӏаш, республике хьахьожадир 3 млрд сом. 2025 шера из хийцар «Дӏаьха, дика вахар» яхача проектаца. Цу юкъа материальни кӏийле чӏоагӏйир лорий моттигий, хьалйир фельдшерско-акушерски пункташ, керда гӏирсаш ийцар.
Гӏалгӏайчен Кулгалхочо хьадийхар, гӏирсаш шоай ханнахьа хьакхачийтар, сиха вӏашагӏдехка болх бе дӏадоладалийтар. Республикан унахцӏенон Министерствонна тӏадиллар из хаттар тӏахьожам болаш хилийтар, иштта говзанчаш кийчбар.
«Нагахьа санна кхыдола хаттараш хьалхашка отташ хуле, уж кхоачашде деза, тӏехьа ца тетташ», - аьлар республикан Кулгалхочо.
