«Эггара дезагӀа дар лорадергда вай» яха болам дӀабихьар вайцигарча наькъашка
«Теркалде-бераш!» яхача Ӏомабалара кхетачен чудоагӀаш, ГӀалгӀайчен Наьсарен кхале гӀолла йолча Россе ОИВД ОГИБДД ДПС болхлоша «Эггара дезагӀа дар лорадергда вай» яха болам дӀабихьар, яхаш, хоам бу «Сердало» газетага мехка бокъонаш лораераша.
«Наькъа полице болхлоша машенаш лехкарашта хьалхадаьккхар, машена чу дагӀача берий кхерамзле лораяр мел лоархӀаме да. Из хӀама бе-башха доацаш, хила йиш яц», - аьлар из кхетаче вӀашагӀъеллараша.
Полицейскеша терко тӀаяхийтар бокъонаш, сага хьалхашка латта декхараш кхоачашде дезаш хилара, цу тайпарча моттигашка хила деза берий лаьрххӀа дола гӀанд, из машена чу леладе деза. Из деррига а зӀамигача бера вахар, цун могашал лораяра деш да. Нагахьа санна иштта уж бокъонаш лораеш хуле, зуламаш кӀезигагӀа хургда.
