«Дай-ноаной онлайн 2.0» яхача кхетаче дакъа лоацаш хилар вай мехкахо
Даьшца, ноаношца бувзам лоаттабарах болча моттигерча оагIон доакъашхо йола ГIоандалой Хадижа Пятигорске дIабихьача цу оагIонцарча гулламе вай республика дIайовзийташ хилар. Из хоам «Сердалога» бир «Бералла наькъаш» яхача Ерригача Россе проекта зарбан болх лелабераша.
«Из кхетаче хIанз шозлагIа дIахьош яр. Ишкола, даьшта, ноаношта юкъерча бувзама хетаяь яр. Кагирхой тахан Даьхенцара хIама лорадеш, кхетам нийсбеш ураоттабарах дийцар гулбеннараша. ГIоандалой Хадижас Къилбаседа Кавказа регионашкара гулбеннарашта хьалхашка белгалдир, дезала, даьна, нанна, ишкола юкъера гIулакхаш мишта лораде деза.
Пайдане хургдараш дIа-хьа эцаш, юкъедаьхача бакъахьа дола кердадараш белгалдеш болх дIабихьар кхетаче вIашагIкхийттараша», - дийцар тха газетага. Берашта доал дерашта, хьехархошта дукха хIама довзийташ моттиг яр из. Юкъедаьха эггара толашагIа, пайданегIа да аьнна хетараш, мехкарча 89 моттигера 600 совгIа доакъашхо гуллургволча Ерригача Россе даьй-ноаной комитета съезде дувца оттадергда.
