ГIалгIайчен хьалха латтараш дакъа лоацаш ба «Низ цхьоагIонца» яхача кагирхой кхетаче
ГIалгIайчен хьинар дараш дакъа лоацаш ба, «Низ - цхьоагIонца» яхача Къилбаседа Кавказа кагирхой кхетаче, из вIашагIъеллай Кавказе дахача къамаша, вай Даьхе лораеш исторически дакъа юкъедарах долча хатарах, Нальчик шахьаре. Из хоам бир ГIалгIай Республикан лоIамхой тароний центра кулгалхочо Галай Назира «Сердало» газетага.
«ГIаьбартой-Балкхарой, Х.М. Бербекова цIерагIча паччахьалкхен университете дIахьош хиннача кхетачене дакъа лоацаш ГIалгIай викалашта юкъе бар Iаьдала болхлой, къона Iилманхой, юкъарлон болхлой. Цу кхетаче Даьхенцара безам совбаккхара даькъ тIара хаттараш дийцар, иштта къамашта юкъе барт хила безарах а. Гулбеннарашта хьалхашка къамаьл деш хилар РФ Президента гIонча Мединский Владимир, СКФО гIолла РФ Президента викал ваь Чайка Юрий, иштта ГIабартой-Балкхарой Кулгалхо Коков Казбек», - йоах хоамо.
Хьалхарча аргIагIа гулбеннараша Сийлахь-боккхача Даьймехка тIом болаш бейнача КБГУ студентий Мемориале зизаш даьхкар.
Ше къамаьл деш Мединский Владимира белгалдир, Кавказа бIухоша дIалоацаш дола дакъа доккха хилар, цу оагIон турпалхой цIераш Россе Паччахьалкхен исторе книжка тIа чIоагIъергхилар. Чайка Юре тIатехар, цхьоагIо юкъарча истореца, российски бахархой культуран низаца чIоагIъеш хилар.
Коков Казбека яхачох, Россе дукхача къамий наха доахача толамаша низ ураоттабу. Цо тIахьийхар кхувш боаргIараш исторически дагалоаттам лорабара, баркал аьлар Украине дIахьош йолча ЛаьрххIача операце бIухой биццабарах.
