Наркотикашта духьала къовсам лоаттабу шахьарашка, юрташка
ГӀалгӀайчен тайп-тайпарча шахьарашка, юрташка бахача наха хьалхадоаккх, наркотикашца къовсам лоаттабе безилга; уж йохкар, эцар, уж наха юкъе доккха зе а деш йоаржаяр бехктокхаме озаш дола гӀулакх долга. Шоай хоамий сайташ тӀа, доал деча моттигашкарча администрацей болхлоша даим кхайкаду цох хьадоалаш дола зулам, лаьрххӀа дола гойтама балхаш дӀахьу, яхаш, дийцар «Сердало» газетага.
Бахархошта хьалхадоаккх, Уголовни кодексо наркотикаш лелаераш бехктокхаме озаш хилар, царех сага вахара кхераме дола зулам хьадоалаш хилар. «ВӀалла ара ца воалийташ, набахта чуволлар да» из; 14 шерга кхаьчачунна, уж йохкаш из вале, бехк бу; «16 шу даьннар уголовни бехктокхаме оз, цӀаккха набахтара араваргвоацаш кхел еш моттиг я», - аьлар хоамо.
Белгалде деза, наркомани карарча хана ГӀалгӀайчен эггара доккхагӀа дола хатар да, иштта дерригача дуненна а хьалхашка латт из. Цунца къовсам лоаттабара керттера дакъа дӀалоац кхувш боагӀарашта лерттӀа кхетам баларо, из мел доккха зулам да царна дӀадовзийтаро.
