Филармоне артисташа дешархошта кердача шера совгӏат дир
Шолжерча №4 йолча ишколе, кердача шера хетадаь цӏай хилар. Из кхетаче вӏашагӏъеллар Гӏалгӏайчен Паччахьалкхен филармоне. Из дӏахьош яр «Пушкина карта» яхача федеральни программа чуйоагӏаш, цо таро лу кагирхошта, мехка дикагӏа йолча культуран кхетаченашка дакъа лаца. Дешархой сатувсаш бар лакха балха говзал йолча артисташа дакъа лацарга, цудухьа филармоне артисташа царна гойтар йицлургйоацаш йола хоза иллей, халхарий программа.
Цига дакъа лоацаш бар начӏал дола артисташ Абаьданаькъан ӏалихан, Йовлой Хьава, Пхьугой Амир, Гарданаькъан Шамал, ӏалхойнаькъан Заира, Барханой Заьлмаха, Долакханаькъан Зульфия, КӀанташанаькъан Жабраил, Эккажанаькъан Роза, Аксаганаькъан Мовсар. Гӏалгӏай ӏадатий ашараш санна, таханарча заман иллеш а даьхар», - аьлар «Сердало» газетага Гӏалгӏайчен керттерча концертни организаце зарбан болх лелабераша.
Концерт чакхдаьлча а артисташ дӏа ца бохийташ дукха тӏоараш детташ лаьттар дешархой. Хьехархоша белгалдир, цу тайпарча кхетаченаша берашта дика кхетам луш хилар. Берашта бӏаргадайра мишта хоза ба дийна хьахозаш бола мукъам, мел дукха къахьег артисташа цу гӏулакха. Из я искусствон, культуран тӏехьален лоархӏаме урок.
