ГӀалгӀайчен доазув тоадаь даргда оагӀой бетта 15-ча денга кхоачаш
Республике дика дӀахьош да «Фусам, шахьара хьалаш» яхача къаман программа чудоагӀаш, доазонаш тоадара балхаш. Еррига гӀишлош шоай ханнахьа (оагӀой бетта 15-ча денга кхоачаш) дӀачуенна хургья.
Карарча шера лаьрхӀад 20 гӀишло тоае ГӀалгӀайчен ийс юрта. Шолже цу тайпара хьакхеллар керда кхоъ салоӀа моттиг, Наьсаре, Магасе - цхьацца. Цул совгӀа, цӀенхашта тоабир 12 урам шахьарашка санна юрташка а. Уж проекташ кхоачашъяра 127 млн сом хьожадаьдар, царех 125 млн федеральни бюджетера дар.
Къаман проектах дӀахьош бола из болх бувцаш, ГӀалгӀайчен кулгалхочо Келаматанаькъан Махьмуд-Ӏаьлас белгалдир, наха салаӀара лаьрхӀа хьаеш йола моттигаш, шахьарашка санна юрташка а хургхилар.
«Хоза тоаяьча моттигаша бахархой а хьаьший а теркам тӀаоз; цул совгӀа, салаӀа, шоай мукъа ха дӀаяхьа, цӀенача фега хила таро я наьха», - аьлар мехка кулгалхочо.
