Регионе гIолла хьаийцача, гуш да дукхагIбола нах шоай цIеношка баха ловш хилар лакха долга. ХIара бетта наха юкъе хаттараш деш дIахьоча балха гуш да, шоай доалахьара фусам хилча, дуккха вахарца дувзаденна декхараш кхоачашде аьттув дикагIа хилар.

Цу хаттарашта жоп луш хиннача 80% наха белгалдеш хиннар дар, шо-шоай цIагIа хьоалчагIа деш, гIалгIай Iадаташ лорадеш, ресторанашка нах ца а кхувлаш, вай даьй хана денз хьадоагIа гIулакх лерттIа дIахо дIадахьа дезаш хилар. Иштта дале а, цхьабараша белгалду ресторане хьоалчагIа дар а харцахьа хIама дац, яхаш.

Иштта 30% наха белгалдеш хиннар дар, квартирашка е хий, е свет йоацаш, е лифт болх беш доацаш моттигаш нийслуш хилар.

Ший доалахьарча цIагIа вахаш хилча, цу тайпара халонаш хургьяц, хилча а уж сел Iаткъаш хилац цIайшца ювзаеннача моттигашта.

Вахар довзачар яхачох, Iан замалахьа е гурахьа ший цIа долча наха аттагIа хул, бакъда бIаьсти е ахка тIаденачул тIехьагIа шоай цIенош хилар ловш бола нах кIезигагIа хул.