«Керттера терко тӀаяхийтар кагирхошта юкъе кхетам балара болх дӀабахьара, вай мехка зулам чудаккха гӀертараша интернете гӀолла леладеш дола гӀулакх юхатохара.

ШоллагӀа дош дувзаденна дар Московски областа Красногорске, 2024 шера тушола бетта 22-ча дийнахьа, «Крокус Сити Холл» яхача концертни зале террористаша даьр дувцарца», - йоах хоамо.

Цу лоархӀамеча кхетачене гулбеннараша дийцар, терроризмаца къовсам лоаттабе безарах, цу кхале бахаш бола кхыча паччахьалкхен бахархой зулама юкъебаргбоацаш лорабе безарах, зулам даржаргдоацаш бола никъ лохаш хила безарах лаьца.

Кхетаче ладийгӀар Шолжа кхале гӀолла йолча ОУФСБ кулгалхочунга Эфенденаькъан Руслана, Россе МВД «Сунженски» МО болхлочо ЦӀечой Нухьа, Шолжа кхален терроризмаца къовсам лоаттабара йолча комиссе секретара Новразанаькъан Темерлана даьча къамаьлага.

Кхетаче йистейоалаш, берригаш а цхьа уйла йолаш бар, ма хулла чӀоагӀагӀа терроризмаца къовсам лоаттабара болх дӀабахьа безарах. Къаьстта деша даха ха йоацача берий, дешара моттигашка, культура ЦӀеношка, кхыйолча вахара гӀишлошка кхерамзлен Ӏалашо хила еза, аьнна, белгалдир кхетачен доакъашхоша.