Нальчике дӀайихьача яхьашка толамаш даьхар вай спортсменаша
13.05.2025 09:36
Укх бетта 11-ча, 12-ча деношка Нальчике дӀайихьача «Динамо» яхача спортацарча латарах йолча фестивале белгалбаьлар вай мехкахой. Из хоам «Сердалога» бир Долакха-Юртарча берий-кагирхой спорта ишколо.
«Къилбаседа Кавказера спортсменаш гулбеннабар ГӀаьбартой-Балкхарой республике дӀайихьача яхье. 16-17 шераш даьнна кагирхой бар шоай низ гойташ хиннараш. Вай мехкарча тоабан юкъерча Дахкилганаькъан Хьамзата 55 кг дозал дарашта юкъе борза майдилг яьккхар, 60 кг йолча дозалах кхоалагӀча моттиге хилар Тоачанаькъан Амир.
Долакха-Юртарча берий-кагирхой спорта ишколе, Гаркхой Шамала Ӏомабеш ба спортсменаш», - йоах тхога бенача хоамо. Тренера белгалдечох, шоай гӀулакх дика довзаш, дӀахо дикка къахьега лаьрхӀа ба къона спортсменаш.
