ГӏалгӀайчен латархоша, СКФО Хьалхален юкъе, шоай говзал гойтар
Эллиной-румий латарах болча спортсменаша дика толамаш даьхар, Къилбаседа Кавказа федеральни куран Хьалхале къайсача. Яхьаш дӀахьош яр 18 шу даьннарашта юкъе, яхаш, дийцар «Сердало» газетага ГӏалгӀай Республикан спортивни латара Федераце.
«Шолжа-Гӏалий тӏара Сайтиев Бувайсара цӀерагӀча спортивни комплексе яхьеваьлар 250 спортсмен. Доакъашхой хьежар шоай говзал гойта, иштта российски хьалхалене дакъа лаца бахара моттиг яккха. Бохтаранаькъан Ӏумара ( 45 кг), Налганаькъан Ислама ( 51 кг), Латаранаькъан Ахьмада ( 92 кг) лакхара совгӀаташ даьхар. Овшанаькъан Хьамзата ( 42 кг), Йовлой ӏаддала (48 кг) дото совгӀаташ даьхар. Ӏалбаканаькъан Салавата ( 80 кг) кхоалагӀа моттиг яьккхар», - аьлар хоамо.
Белгалду, Нохчий Республике яхьаш дӀахьоча вахавар мехка ондаргий гулъяьча тоабан воккхагӀа вола тренер Ӏарпенаькъан Ислам.
