Долакха-Юртара латархой котбаьлар, республикан дикагӏбараш хоржача яхье
Долакха-Юртарча спортсменаша, Магӏалбике дӏахьош хиннача ший лоӏамеча кӏалкхетаргах латара республикан яхье котало яьккхар, яхаш, дувц «Сердало» газетага берий лаьрххӏача викалаша.
«Яхьаш дӏахьош хиннача шин дийнахьа, тӏема сийлен шахьаре къовсабелар 2009-2011 шера баь ондаргаш.
Цу майдан тӏа, Долакха-Юртарча берий-ондаргий спортивни ишколе ӏомалуш бараша диъ совгӏат даьккхар. Гаракхой Адам, 60 кг дозал долаш, яхье котваьлар. Коазой Мухьмад лакхарча лагӏа тӏа эттар, 110 кг дозал долаш.
Бештой Жабраила «борза» совгӏат даьккхар, 71 кг дозал долаш. Уж кхо спортсмен кийчваьр Гаракхой Шамал ва. Тиймарзанаькъан Микаила, Акхасаганаькъан Микаила хьехамца, цу яхьашка шоллагӏа моттиг яьккхар, 80 кг дозал долчарна юкъе», - аьлар тхоца къамаьл даьчо.
Белгалду, шоаш дакъа лацара чаккхе еш, Гаракхой Адам, Коазой Мухьаммад хержар Россе цӏихезача тренера Джамалдинов А.А. сийна дӏахьоча «Доттагӏал, машар - Кавказа» яхача Халкъашта юкъерча яхье дакъа лаца, из дӏахьоргья маьтсела бетта 9-10-ча деношка Хасавюрта.
