Россе къаман гулъяьча тоабанна юкъевахав вай мехкахо
16.10.2024 10:27
Албане дӀаяхьа лерхӀача эллиной-румий латарах йолча чемпионате гӀоргйолча Россе гулъяьча тоабанна юкъевахар вай мехкахо. Из хоам «Сердалога» бир спортацарча латарах йолча федераце.
«Цу йоккхача яхьашка дакъа лаца хержарий цӀераш яьхар укх деношка эллиной-румий латарах йолча Россе вӀашагӀтехача тоабан тренера Тотров Рустама. 77 кг дозал дарашца ший низ гойташ хургва «Ади Ахмад» яхача спортклуба доакъашхо БӀарахой ИсмаӀал», - йоах хоамо.
«Чемпионатага кхоачале, ИсмаӀала хьабенар атта никъ бац. Дошув даккха лаьрхӀа ва мехкахо вай республиканна. Лакха начӀал долаш, ший гӀулакх дика довзаш спортсмен ва из», - дийцар тха газетага спорта гӀулакхех йолча министерствон кулгал деча Белхарой Руслана.
