Хоаной вежарий Монголе дӏайихьача яхье котбаьлар
Гӏалгӏайчера вежарий Хоаной Исмаӏал, Мухьмад-Тӏахӏир котбаьлар, ший лоӏаме кӏалкхетаргах латара Вӏашгӏтехача дунен къовсамий (UWW) ӏӏӏ-ча лерхӏам белгалбеча Монголе хиннача «Ulaanbaatar Open» оалача яхье.
«Тӏеххьара къовсамий ди долаш, Монголе шахьаре Улан-Баторе вай мехкахоша республиканна лакхача боарама шиъ майдилг ера. Хоаной Исмаӏала 79 кг дозал долаш, лакхара совгӏат даьккхар. Из йиллача ханал хьалха латар дӏадихьа ваьннарех хилар Монголерча викалца латаш (11:0), Инде викалца - (10:0), юха а Монголерча спортсменаца - (14:4), иштта Иранерчунца - (10:0). Хоаной Мухьаммад-Тӏахӏир дӏачӏоагӏвелар 97 кг дозал долча дикагӏбарашта юкъе. Из а диазза летар, юххера монголе латархо эшавир цо 10:0 йолаш», - аьлар ГӏР спортивни латара Федераце.
Тхога хоам баьчо яхачох, российски спортсменаша толамаш дахарах мехка гулъяьча тоабо, 163 очко йолаш, хьалхара моттиг яьккхар. Шоллагӏа моттиг кхаьчар Инде тоабанна (152 очко), хӏаьта кхоалагӏа совгӏат кхаьчар Казахстана спортсменашта (137 очко).
