Шолжера керттера базар дӀакъайлай, цӀи яьнначул тӀехьагӀа
Дукха ха йоацаш цӀи яьнна хиларах, Шолжера керттера базар Ӏаьдало дӀакъайлар, цига кхерамзлен Ӏалашо ю балхаш дӀадахьа дагахьа. Из лаьрхӀар, шахьара кулгалхочо Ӏумаранаькъан Аслана базара даькъ тӀа дӀайихьача кхетаче, яхаш, дийцар доал деча даькъ тӀарча зарбан болх лелабераша.
ЦӀи ялара бахьан тохкаш хиларца, иштта кхыдола балхаш дарца дувзаденна, базар болх беш хургьяц.
Цига керттердар - дизайн-проекташ йоагӀаш ма хиллара юкъейоалаеш хила еза, базар тӀа болх беш болча наьха кхерамзлен Ӏалашо хилийтара, хьалхарча аргӀагӀа - цӀи ялара кхерамзлен. Шахьара кулгалхочо Ӏумаранаькъан Аслана белгалдир, керда проекташ оттаеш юкъедоаладе деза базар тӀа латтача а, иштта цига хьабоагӀача а наьха кхерамзле лораяр.
Вай деррига а де деза, цу тайпара хьал кхы нийслургдоацаш», - аьлар Ӏумаранаькъан Аслана. Цо иштта аьлар, сага вахар а цун могашал а хьалхарча аргӀагӀа теркам лоаттабе безаш йолга. Шахьара Ӏаьдал лаьрхӀа да, базар меттаоттаяра болх, ше тӀа а хьожаш, дӀабахьа, из кхераме а йоацаш, наха паргӀата а йолаш хилийтара.
