ЦТКиКИ дӀахьоргья ГӏалгӀайчен столице «Дагалоаттама лента» яха кинокхетаче
ХьатӀадоагӀача кӀира театра, кинон, таханарча заман тароний Центро ГӏалгӀайчен столице дӀахьоргья «Дагалоаттама лента» яха кинокхетаче, из хетаяь я фашистий гӀаьрхой советски эскаро эшабаь 80 шу дизара, «Даьхен лорбой» Шу хилара, яхаш, дийцар «Сердало» газетага ЦТКиКИ зарбан болх лелабеча Пхьиленаькъан Аьсета.
«Программа керттера дакъа дӀадолалургда кӀимарса бетта 22-ча дийнахьа; театра, кинон, таханарча заман тароний Центра даькъ тӀа. Доакъашхошта цӀихезача режиссёраша, продюссераша, актёраша лургда говзанчий хьехамаш. Цу юкъе керттера да «Ноахалий дагалоаттам» яха герга истол, цига хьожаргба тӀема исторега, из кино хьакхолларашта накъадаьнна хиларах дувцаргда.
Россе кинематографистий Союза отделеней доакъашхоша дувцаргда цӀихезача мехкахоех, царна карагӀдаьннарех, 1941-1945 шерашка Сийлахь-боккха Даьймехка тӀом латташ», - аьлар тхога хоам баьчо.
Кхаьрача дийнахьа культуран дегӀаахара Центре хургья тӀема-патриотически кхетаче «Дагалоаттама лента». Тӏема шерашкара байташ а иллеш а алар цу юкъедоагӀаш хиларах, ЛаьрххӀа йола операци дӀахьош болча шоай мехкахоех доаккхал дергда цига дакъа лоацаш хургболча наха.
