Халкъашта юкъерча кагирхой фестивале, дакъа лоацаш ба вай мехкара викалаш
Халкъашта юкъера кагирхой фестиваль я, Екатеринбурге дӏахьош. Урала столице 191 дунен мехкашкара 10 эзар совгӏа доакъашхой гулбеннаб. «Сатувсачунга кхача хьажа» яхача чӏоагӏонца дакъа лоацаш ба цига вай мехкара викалаш.
«Хьинар долча, доккхача гӏулакхашка, толамга кхача гӏертача къонабарех латташ я вайцигара тоаба. Фестивала хӏара ди тайп-тайпарча хӏамаех дизза да. Проектий сессешка дакъа лоацаш, шоашкара кердадараш довзийташ, боккхача говзанчашка хаттараш деш, шоаш санна барашца бувзам чӏоагӏбеш ба вай къонабараш», - йоах «Сердалога» кагирхой гӏулакхех йолча Комитетера кхаьчача хоамо.
Халкъашта юкъера дискуссионни клубаш, тоабашта лу декхараш, культуран оагӏонцара кхетаченаш – из деррига фестивала чудоагӏаш да. Вай мехкара цига бахача къонабарашта дукха хӏама довзийташ моттиг хилар цох.
