Гӏирмерча «КСВО Академе» оагӏонца, дакъа лоацаш ба вай мехкара викалаш
Гӏирмерча «Меганом» яхача кхоллама гӏулакхех йолча Академе йоаржайир «КСВО Академи» яха Ерригача Россе проект. Хьинаре къахьега лаьрхӏа йола 4ӏ моттигера 50 толашагӏа йола тоаба вӏашагӏтехар кхетаче. Цига бар вай мехкарча СВО доакъашхой дезалий Комитетера викалаш.
Моттигашкарча штабий болх дикка чӏоагӏбеш хургья цига йоаржаеш йола программа. Массехк дийнахьа тӏемахой дезалашта юридически, психологически оагӏонцара гӏо лоаттадар мишта хила деза гойташ болх дӏахьоргба цига, иштта вахара оагӏонцарча проектированех дола ӏомабалар, хьакимашцарча бувзамах йола сессеш дӏахьоргья.
«Даьхе лораеш латтарашта гӏо лоаттадара тӏехьа дикка пайда беш да Академе дакъа лацар. Гӏалгӏай штаба болх боаггӏача боараме хьаоттабе, тоабе лаьрхӏа да тхо. Хӏара адресах новкъостал лоаттадарал совгӏа, дӏахойодача хана а бӏухошта, цар цӏагӏарча наха а пайдане, диканна хургйола проекташ хьакхоллар да тхона лоархӏаме», - аьлар «Сердалога» вай мехкарча КСВО штаба кулгал деча Эсамарзанаькъан ӏалаудина.
«КСВО Академи» яхар лоархӏаме, ерригача Россе моттигашкара Даьхен гӏулакха арабаьннарашта гӏо де ловраш вӏашкаозаш бола оагӏув ба. Федеральни оагӏонгара цхьацца кердадараш, пайдане хургдараш хьаэца аьттув ба вай мехкарча викалий. Даьхе лораеш латтарий дезалашца болх дӏахьош дикка накъадаргда цига ӏомадаьр, дайзар.
