Гӏалгӏайчен викалаш дакъа лоацаш ба, унахцӏенон таьрахьий кхетаче
Гӏалгӏайчен унахцӏенон Министерстваон ИТ-говзанчаш, министра гӏончас Коазой Мурада кулгал а деш, дакъа лоацаш хилар «Нальчик-2026» унахцӏенон таьрахьий кулгалхой, кхелахой Ерригроссийски ӏV-ча кхетаче. Цига дийцар, искусственни интеллект лорий балха даьк тӏа яккхара Россе Минздрава керттера хаттараш. Керттера терко тӏаяхийтар ИИ технологеш юкъеяхара, региона дарбанчешкара болх таьрахьашка баккхара.
«Гӏалгӏайчен унахцӏенон министерство ший аргӏагӏа таьрахьашка ялара дегӏайоагӏаш я, цо цу даькъ тӏа толамаш доах. Оаха кхетаду, вай заман таьрахьий технологеш юкъеяхар лоархӏаме а унахцӏенон дика пайда луш а хилар. Со тешаш ва, Гӏалгӏайчен Минздрава кхыбола болх дегӏабоалабарца цхьана таьрахьий таронаш юкъеяхарах, вай бахархошта лорий новкъостал дара болх тоабергба», - аьлар «Сердало» газетага Коазой Мурада.
Йоккхача кхетаче яьнначул тӏехьагӏа, дӏахо дӏабихьар «ИИ заман таьрахьий унахцӏено» яхача даькъ тӏара болх. Говзанчаша дийцар практически оаза новкъостал юкъедаккхарах, иштта видео гӏолла унахцӏенон къоастадераш, корпоративни ИИ юкъеяккхарах, диспансеризаци яра электронни лорий карташ леладар.
Лоархӏаме къамаьл дир импорта таронаш ИТ юкъейоаккхаш дегӏайоалаяра даькъ тӏа. Цул совгӏа, эксперташа дийцар инсульт хилара хьал, хьалххе а из хургдий хара халкъашта юкъера говзал лелаярах.
Гӏалгӏайчен унахцӏенон тоабан кхетаче дика накъаяьлар берригача мехкарча лорий балха говзал йовзара, иштта таьрахьашка балара йола керттера таронаш ӏомаяра. Цига шоаш хьаийцар царна накъадаргда дӏахо ИТ технологеш малагӏча даькъ тӏа дегӏайоагӏаш хургья хара.
