Гӏалгӏайчен викалаш бахар Казане бодача пресс-новкъа
Гӏалгӏай республикан викалаш бахар Казане дӏахьош болча пресс-новкъа дакъа лаца. Из нийсделар Гӏалгӏайчен кулгалхочо Келаматанаькъан Махьамуд-ӏаьлас, Татрий мехка кулгалхочо Минниханов Рустема шин республиканна юкъе бувзам лелабара кулг яздаь хиларах.
Наькъа доакъашхой дӏабахар Осканаькъан Сулумбика цӏерагӏча «Магас» аэропортера «Казань-Магас-Казань» яхача миха кемаца. Бувзамий болх дӏаболабаьб 2025 шера ардара бетта 7-ча дийнахьа.
Оагӏой бетта 2-ча денгара 4-ча денга кхаччалца, мехка культуран, туризма министерствай болхлой, иштта «Гӏалгӏайче» яхача ГТРК, «Магас» НТРК, «Сердало» оалача Кепайоазон цӏен болхлой, республикан кхыча балха доакъош тӏара викалаш таро йолаш ба Татрий мехка культуран моттигаш йовза.
Уж гӏоргба Дерригача дунен тӏехьале йолча ЮНЕСКО моттиге – Казанера къубба йолча, «Татрий оагӏув» яхача археологически музее, «Мекъа тӏаьрг» яхача исторически гӏишлош йолча. Программа чудоагӏаш да иштта Свияжск яхача гӏайре-шахьар йолча экскурси яр.
Цул совгӏа, Гӏалгӏайчера бахача хьаьшашта Татрий Республикан туристий таронаш гойтаргья, иштта дӏахьоргба эчпочмака музее-цӏагӏара говзанча хьехам, цига гойтаргда татрий къаман эчпочмак оала даар мишта кийчду.
