Гӏалгӏайчен викалаша дакъа лаьцар «Вахара керда духлохам» яхача кхетаче
Гӏалгӏай Республикан викалаша дакъа лаьцар «Вахара керда духлохам» яхача куран кхетаче, из дӏайихьар Шолжа-Гӏалий тӏа, яхаш, дийцар «Сердало» газетага Ерригроссийски «Бералла наькъаш» яхача проекта медиа-говзанчас Коазой Миланас.
«Цига дакъа лаца таро хилар Гӏалгӏайчен ишколай кхетам балара даькъ тӏарча кулгалхой гӏончий, иштта дешархой, мехка яхьашка котбаьннарий.
Цар дийцар, кхетам балара даькъ тӏа таханарча заман хьалаш юкъедоахаш, хила везарах; иштта ишколе а дезале а дакъа юкъедахьаш саг хьалкхевеш хила дезарах, цун маӏан да кхувш йоагӏача тӏехьенца беш бола болх аттача баккхар. Къаьстта дола дакъа дӏалоац граждански кхетам балара дешо.
Нохчий Республикан столице хьехархоша шоайла балха говзал ийцар, цига дийцар дешархошта луш болча кхетама балха юкъе, дин мах бараш чӏоагӏдара, иштта цар уйла дикагӏа кхоллама, хӏама довзара тӏайодаш хургйолаш оагӏув лаха безарах», - аьлар хоамо.
Тхога хоам баьчо яхачох, гуллам вӏашагӏболлача тоаба юкъевера моттигерча проекта болх лелабу Колой Саӏид, доал дара даькъ тӏара болх лелабераш, иштта моттигерча тароний центра болхлой.
«Цу тайпарча кхетаченаша таро лу хьакхолла цаӏ йола дешара моттиг, цига ӏадаташ цхьана нийслуш да таханарча хьалашца», - аьлар Колой Саӏида.
