Ардара беттара хьехамаш ду саг хилар, Магасерча Саьпарӏаланаькъан Демирах
Магасерча «Марем» яхача гимназе кулгалхочун гӏонча волаш болх дӏахьош волча Саьпарӏаланаькъан Демирах «Бетта хьехамаш ду саг» хилар, ардара бутт чулоацаш. Из хоам «Сердалога» бир «Бералла наькъаш» яхача Ерригача Россе проекта зарбан болх лелабераша.
«Шийна хьалхашкара декхараш дизза кхоачашдеш, бехктокхаме болх дӏахьош волча Демира баркал оалаш каьхат делар. Бераш дикача, пайда боаржабеш долча гӏулакхашта тӏахьехаш, цар дегаш цӏенача, вахаре эшаш долча хӏамашта тӏехьа сомадоахаш тӏатеӏӏа къахьегаш хьавоагӏа из, болх бе волавеннача дийнахьа денз.
Тахан ший моттиге лоархӏаме болхло ва из», - дийцар тха газетага. Дӏабахача бетта, ӏамархана Демира кулгал деш, хьехархой Денна хетадаь газет кийчдир бераша, «Вахара ха» яхача кхоллама боламе дакъа лаьцар, иштта «Са баьцовгӏаш», «Экодесант: цӏена берда йистош» яхача яхьашка шоай говзал, хьинар гойташ хилар. Цул совгӏа, «Новкъостал лоаттадара оагӏув» яхача гӏо деча боламга гӏолла, цхьаь яха йоккха саг йолча даха хилар бераш.
«Бералла наькъаш» яхача проекта тоабо доккха баркал кхайкаду иштта тӏехдика ший декхараш кхоачшдеш волча Саьпарӏаланаькъан Демира.
