Паччахьалкхен Думан депутата Бӏарахой Бек-хана хьаллаьцар Гӏалгӏайчен къона хоккеисташ
Паччахьалкхен Думан депутата Бӏарахой Бек-хана хьаллаьцар Гӏалгӏайчен къона хоккеисташ. Цо царна белар «Аьрзи» яхача шан даькъ тӏа ӏомалуш болча хоккеисташта лаьрхӏа бола спортивни гӏирс. Царна ийцар 50 бизза тӏабувха гӏирс, иштта тренировкаш дӏахьош эшаш бола кхоачам. Из цо хьалхара деш дац. Хьалха цо новкъостал дарах, профессиональни гӏирсаш ийцар Фетисов Вячеслава цӏерагӏча академе ӏомалуш волча 100 хоккеиста. Цу тайпара новкъостал даро, цу берий даьй таронаш аттача йоах, иштта дика кӏийле ю берий-ондаргий спорт республике дегӏайоалаяра.
«Из новкъостал, Гӏалгӏайчен берий спорт дегӏайоалаяра республикан кулгалхочо Келаматанаькъан Мухьмуд-Ӏаьлас, иштта «Цаӏ йолча Россе» парте терко лоаттаяра чудоагӏаш дола цхьа дакъа да. Цун тӏехьа латт атта доаца а лоархӏаме а дола декхар: берашта шоашта дезаш дола гӏулакх леладара таро ялар, уж унахцӏена кхедар. Хӏара тренировкаш дӏа мел хьоча хана, дог делаш, ша тӏа тешшаме борал деш, керда толамаш доахаш бахалба уж. Массаза а царна уллув хилба царех тешаш, уж хьаллаца кийча нах!» - аьлар «Сердало» газетага Гӏалгӏай «Цаӏ йолча Россе» парте моттигерча даькъе.
Бӏарахой Бек-хана даьр лоархӏаме новкъостал да республикан спорт дегӏайоалаеча даькъ тӏа, хӏана аьлча хоккей эггара дезагӏа дола спорта тайпа да, цун бахьан да тӏабувхабу гӏирс, инвентарь маьха еза хилар.
Депутата шийгара новкъостал деш хиларо, Гӏалгӏайчен дӏаболалуш болча спортсмений дезалера ахчанцара хьал дикка аттача даьлар. Цо дика кӏийле ю республикан хургбола спортсменаш кхебара.
