Депутата Мейренаькъан Исламеи гӀо деча «Основа» яхача моттигои СВО Донецкерча бӀухошта кхача бихьар
Шолжа-Шахьарерча депутатий совета кулгалхочун гӀонча волча Мейренаькъан Ислама, «Основа» яхача гӀо деш йолча моттигаца Донецке тӀема операцен юкъе дакъа лоацаш болча бӀухошта новкъостал дахьийтар. Укх наькъа кхача, моастагӀчун хоалургбоацаш хьулабеш дола сеткаш тӀадола машин Донецке латтача 87-ча полке кхоачаргья.
Шахьара депутатий советагара, эггара дукхагӀа эшаш йола хӀамаш йихьар цига: бе-бе ишк, чай, шекар, даьтта, иштта кхыйола хӀара денна эшаш йола хӀамаш. 87-ча полка бӀухоша доккха баркал аьлар вай мехкахошта, шоашка хьожаш хиларах.
«ХӀара посылко хьахойт тхона, вай къаман наха тхоаш дагадоахкилга, гӀо де кийча болга. Тахан дерригаш а Даьхен гӀулакха латташ да вай, хӀаьта вӀаший бувзам хиларо бӀухой дог ураоттаду!» - белгалдир цар.
Хьоахаде деза, дӀабахача бетта Мейренаькъан Ислама, «Основа» яхача гӀо деш йолча моттигаца Краснодарера хӀамаш яхьийталга Крыме латтача вай бӀухошта.
